|
STRIGHE
 Se
te ghe domandi a uno: "Ciò, ghe crìdito in te le strighe?" Quelo
el te varda co"na facia da compatimento e, anca se no"I te lo dise,
el pensa: "Poaréto, cussì 'sóvane, l'è'sà via co' i sui". 0 sinò
: "Quanto ièto restà indrio, s'a te cridi ancora in te le strighe!"
Ma 'na volta, no'ía ièra cussì, i ghe credéa, e come! A ne so quanti
de valtri i se ricorda, ma a gh' ièra parfin'na legenda. Quando
che la Madona, San Giusepe e'l Bambin i ièra drio scapare in Egito,
parché chei desgrassià de Erode el voiéva farghe la pèie al Bòcia,
i s'ha intivà in te'na patulia de soidà che'ndava in giro sbudelando
tuti i fiòi piceniti.
 La
Madona a gh'è vegnù el spalpagno. "Chi 'desso i me còpa el Fiòio!"
L'ha girà i òci e l'ha visto vissin de ela, 'na vècia tuta vestia
de nero, che la ghéva un travessón lungo fin ai piè. Questa l'ha
vardà la Madona, la ga tolto el Putìn, la se l'ha messo in travessa
che, de colpo, la s'ha impenì de fiuri. Có la masnada de militari
l'è rivà tacà a 'sta combricola, la se ferma, la varda la Madona
e la vede che no'ia ga gninte, la varda San Giusepe e la vede che
no"I ga gninte, la varda la vècia co"sta sgrembiuià de fiuri. El
capo el ghe domanda: - Còssa gato lì, vècia?
E
ela, mostrandoghe bèn la só traversa piena de fiuri freschi, bèn
destirà co' 'n fare da tòrio par e] bèrio dedrio, la ghe risponde:
- Rose e viole, bèi comandante.
 Cussì
la ronda l'è tirà drita, no'savéndo ch'el Putìn el ièra sconto proprio
sóto i fiuri. 'Sta vècia la ièra 'na striga. Alora Maria, par ringrassiaria,
la ga dito: - Ti t'ha fato 'na roba granda. D'ancuò in avanti, a
sarà valido 'sto dito: " Striga cuèrta e donassa descuèrta". Par
dire che se una la ièra 'na striga, no' se sarìa mai savésto de
sicuro, par quanti sospeti ca ghe fusse; se una la ièra 'na poco
de bòn, la sarìa sta'su la boca de tuti, sensa remissión e dubi
de sorta.
(Fonte:
Sergio Bedetti, Adria)
|
